تاكسي



"نملة سوداء على صخرة سوداء في ليلة حالكة الظلمة يرزقها الله"
خالد الخميسي - تاكسي / حواديت المشاوير


"أصل الرزق ده مش بتاعك و الفلوس دي مش بتاعتك ، كله بتاع ربنا . . دي الحاجة الوحيدة اللي اتعلمتها في حياتي"
خالد الخميسي - تاكسي / حواديت المشاوير


"الزحمة مش من المظاهرة . و هى دي مظاهرة أصلا ، إحنا كنا زمان بننزل الشارع بخمسين ألف . . بميت ألف . . إنما دلوقتي مفيش حاجة لها معنى . . كام واحد نازلين من بيتهم عشان حاجة ماحدش عارفها ، و الحكومة مرعوبة ، ركبها بتخبط في بعضها . . حكومة والله نفخة و تقع . . حكومة من غير ركب"
خالد الخميسي - تاكسي / حواديت المشاوير


"أنا : أنا برضه مافهمتش ليه ١٨ و ١٩ يناير [١٩٧٧] كانت بداية النهاية ؟
السائق : الحكومة عرفت بعدها إنها لازم تتصرف . . و إن المظاهرات دي أصبحت خطر عليها بجد . . ١٨ و ١٩ يناير ماكانتش أى حاجة ، دي كانت بداية ثورة لكن تقول إيه . . ماكماتش . . و من ساعتها الحكومة زرعت فينا الرعب من الجوع ، خلت كل زوجة تمسك في إيد جوزها و تقوله إوعى تنزل . . العيال حتموت . . زرعوا الجوع في بطون كل مصري ، رعب خلا كل واحد يقول يالا نفسي ، أو يقول و أنا مالي هى جت على ، ١٨ و ١٩ يناير كانت بداية النهاية"
خالد الخميسي - تاكسي / حواديت المشاوير


"شعب مهووس و الله . . مش لاقي ياكل و كل واحد ماشي معاه موبايل و في بقه سيجارة . .
رجالة المفروض عندها مخاخ و بتدفع كل فلوسها على المصيبتين دول التليفونات و السجاير ، و في الآخر يقولوا أصل البلد حالتها مش و لا بد .
كل فلوس الناس بتروح في جيب أربع شركات . . الإتصالات و موبينيل و فودافون و شركة الشرقية للدخان"
خالد الخميسي - تاكسي / حواديت المشاوير


"أنا لو مسكوني البلد دي يوم واحد ، لأ دقيقة واحدة . . القرار الوحيد اللي ح أطلعه هو منع الإعلانات .
زمان على أيامنا كانت الإعلانات لخدمة المجتمع همه كام إعلان ، و كان الله بالسر عليم ، إنما دلوقتي الإعلانات لخراب المجتمع و حتخربها و تقعد على تلها . و ابقى قول أبو إسماعيل قال لي"
خالد الخميسي - تاكسي / حواديت المشاوير


"ماعرفش إيه اللي حصل . . الدنيا إتغيرت ، ولا أنا اللي إتغيرت . ."
خالد الخميسي - تاكسي / حواديت المشاوير


"و نزلت من التاكسي تحت منزلي فوجدت أربعة من الشباب يدخنون السجائر المارلبورو و يشربون كوكاكولا و يرتدي أحدهم حذاء نايك و يلبس الآخر تي شيرت على كمه الأيسر علم أمريكا ، فتبخرت شحنة التفاؤل و صعدت إلى منزلي مطأطأ الرأس"
خالد الخميسي - تاكسي / حواديت المشاوير


"السائق : يعني كنت بلطش في كل حاجة . . و بعد كدة اشتغلت شوية في توشكى .
أنا : و الله !! . . ده المشروع القومي بتاع الأيام دي .
السائق : لا . و لا قومي ولا حاجة . . ده مشروع مات خلاص .
أنا : مات إزاى ؟
السائق : إحنا كان عندنا أمل كبير قوي فيه . . و حسينا إن الدنيا أخيرا ح تبتسم لنا و لكن للأسف خلص خلاص . . و أنا إيه اللي جابني على مصر مفيش حاجة تتعمل هناك . . خلاص .
أنا : لو اللي بتقوله ده صحيح تبقى كارثة .
السائق : اللي بقولهولك ده صح مية في المية . . الموضوع بالنسبة لنا كـ ناس ساكنة هناك بخ ، يعني ببساطة شغل لينا مفيش .
بس كارثة ليه كف الله الشر ؟ ما الدنيا سواقي قلابة . . مافيش كارثة ولا حاجة .
أنا : لأ مصيبة طبعا . . ده مصر صرفت في المشروع ده مليارات ."
خالد الخميسي - تاكسي / حواديت المشاوير